Back

ኢህአዴግ እና ተቃዋሚ ፓርቲዎች ውይይትና ድርድር ለማካሄድ ተስማሙ

የኢትዮጵያ ህዝቦች አብዮታዊ ዴሞክራሲያዊ ግንባር/ኢህአዴግ/ እና ህጋዊ እውቅና አግኝተው የሚንቃሳቀሱ ተቃዋሚ ፓርቲዎች በተለያዩ ሀገራዊ ጉዳዮች ዙሪያ ውይይትና ድርድር ለማካሄድ ተስማሙ፡፡
መሪው ድርጅት ኢህአዴግና ተቃዋሚ ፓርቲዎቹ ዛሬ ባካሄዱት ውይይት በሚያስማሙ ጉዳዮች ዙሪያ ውይይት ለማካሄድና በሌሎች ጉዳዮች ዙሪያ ደግሞ እንደአስፈላጊነቱ ድርድር ወይም ክርክር ለማካሄድ ተስማምተዋል፡፡
መድረኮቹ ከመካሄዳቸው በፊት የስብሰባ ስናስርዓት ምን መምሰል እንዳለበት፣ በታዛቢዎችና መሰል ጉዳዩች ዙሪያ አማራጮችን በጽሑፍ እስከ ጥር 25 ቀን 2009 ዓ.ም ድረስ ለህዝብ ተወካዮች ምክር ቤት ጽ/ቤት ለማስገባት ተስማምተዋል፡፡
በሀገርቱ እየተካሄደ ያለውን የዴሞክራሲያዊ ስርዓት ግንባታ ለማሳለጥ በኢህአዴግ በኩል ቁርጠኛ አቋም መኖሩን በውይይቱ ወቅት የኢህአዴግ ም/ቤት ጽ/ቤት ኃላፊ አቶ ሽፈራው ሽጉጤ ተናግረዋል፡፡
በሚዘጋጁ የውይይትና ድርድር ብሎም የክርክር መድረኮች ላይ ህጋዊ እውቅና ያላቸው ሁሉም ሀገር አቀፍ ፓርቲዎች መሳተፍ እንደሚችሉ የገለጹት አቶ ሽፈራው ክልል አቀፍ ፓርቲዎች ደግሞ በየክልሉ በሚዘጋጁ መሰል መድረኮች መሳተፍ ይችላሉ ብለዋል፡፡
በውይይቱ የተሳተፉት የተቃዋሚ ፓርቲዎች ተወካዮች በበኩላቸው  የመድረኩ መዘጋጀት አስፈላጊ መሆኑን ጠቅሰዋል፡፡
የአንድነት፣መኦህዴፓና የኢፍዴኃግ ተወካዮች በበኩላቸው በሰከነ አኳኋን የመወያየት ሁኔታ መለመድ እንዳለበት ጠቅሰው ቀጣይነት እንዲኖረው ሁሉም የበኩሉን ሊወጣ ይገባል ብለዋል፡፡
በዛሬው ውይይት 20 ህጋዊ እውቅና አግኝተው የሚንቀሳቀሱ ሀገር አቀፍ ፓርቲዎች ተሳትፈዋል፡፡
ኢህአዴግ ከተቃዋሚ ፓርቲዎች በተጨማሪ ከምሁራንና ከሲቪክ ማህበራት ጋር ውይይት እንደሚያካሄድ ማስታወቁ ይታወሳል፡፡


ኢህአዴግ

ኢህአዴግ አገር የመምራት ሃላፊነትን ከተረከበ ጊዜ ጀምሮ ከውስጥም ከውጭም የሚነሱ በርካታ ውጣ ውረዶችን ያስተናገደ ድርጅት መሆኑ ይታወቃል፡፡ ከአገራችን ነባራዊ ሁኔታ ጋር የሚጣጣምና የህዝባችንን ሁለንተናዊ መለወጥ ታሳቢ ያደረገ የፖለቲካና ኢኮኖሚ ስርዓት በማራመድ በውጭ ሃይል ተፅእኖ የሚጠመዘዝ ድርጅት አለመሆኑን ገና በጠዋቱ በተግባር ያሳየ ድርጅት ነው፡፡

ከደርግ ውድቀት ማግስት አገራችን የመበታተን ስጋት ውስጥ የነበረችበት ሁኔታ ቢኖርም መላ የሃገሪቱን ህዝቦች በማስተባበርና በብስለት በመምራት ዴሞክራሲያዊ አንድነቷ በፅኑ መሰረት ላይ እየተገነባ እንዲዘልቅ አስችሏል። ህገ መንግስታችን የአንድነታችንና የመከባበራችን ማሰሪያ ውል እንዲሆን በሚያስችል መልኩ በህዝብ ሙሉ ተሳትፎ ተቀርፆ በመፅደቁ ያንን የመበታተን ስጋት ተሻግረን በጋራ ለዘላቂ ለውጥ መረባረብ ጀምረናል።