Back

የኢህአዴግ ስራ አስፈፃሚ ኮሚቴ መደበኛ ስብሰባውን ጀመረ

የኢህአዴግ የስራ አስፈፃሚ ኮሚቴ የተሃድሶ ንቅናቄ የደረሰበት ሁኔታ እና የሁለተኛው የዕድገትና ትራንስፎርሜሽን ዘመን የሁለተኛው ዓመት አጋማሽ አፈፃፀም ሪፖርትን በዝርዝር  በመገምገም ቀጣይ አቅጣጫዎችን ለማስቀመጥ መደበኛ ስብሰባውን በዛሬው ዕለት (የካቲት 27 ቀን 2009ዓ.ም) መጀመሩን የኢህአዴግ ምክር ቤት ጽሕፈት ቤት አስታወቀ፡፡
ኮሚቴው ኢህአዴግ በይፋ የጀመረው እንደገና በጥልቀት የመታደስ ንቅናቄ ከአመራሩና ከአባሉ አልፎ ወደ ሲቪል ሰርቫንቱና ህዝቡ እንዲወርድ የተቀመጠው አቅጣጫ የታሰበለትን ዓላማና ግብ በትክክል ማሳካት አለማሳካቱን በዝርዝር መገምገም ጀምሯል፡፡ ግምገማው ጥልቀትና ስፋት ይኖረው ዘንድ በቂ ዝግጅት መደረጉንም መግለጫው አመልክቷል፡፡
የኪራይ ሰብሳብነት አስተሳሰብና ተግባር ወኪል የሆኑት ትምክህት፣ ጠባብነትና የሃይማኖት አክራሪነት እንዲሁም ስልጣንን ለግል ጥቅም የማዋል አመለካከትና ተግባር ድርጅቱንና ሀገራዊ የህዳሴ ጉዞ የሚፈታተኑ አደጋዎች መሆናቸው የጠቆመው የፅሕፈት ቤቱ መግለጫ ህዝብን ጨምሮ በየደረጃው ትግል እንዲደረግባቸው የተቀመጠው አቅጣጫ የደረሰበት ደረጃም በዝርዝር ይገመገማሉ ብሏል፡፡
ዴሞክራሲያዊ የመድብለ ፓርቲ ስርዓቱ ይበልጥ ከማጠናከር አንፃርም በሕጋዊ መንገድ ከተደራጁ የፖለቲካ ኃይሎች ጋር እየተደረጋ ያለው ውይይት በመገምገም በቀጣይ ተጠናክሮ በሚቀጥልበት ሁኔታ ላይ አቅጣጫ ያስቀምጣል ተብሎ ይጠበቃል፡፡
ስራ አስፈፃሚ ኮሚቴው በየደረጃው ህዝቡ ሲያነሳቸው የነበሩ እና ፈጣን ምላሽ ያሻቸዋል ተብለው የተለዩ ጉዳዮች አፈፃፀም በዝርዝር ይገመግማል፡፡ የወጣቶች ተሳትፎና ተጠቃሚነት በተመለከተም የወጣቶች የስራ እድል ፈጠራ እንቅስቃሴው የደረሰበት ደረጃ በመገምገም ቀጣይ አቅጣጫ ያስቀምጣል፡፡
ስራ አስፈፃሚ ኮሚቴው በግምግማው የሁለተኛው የዕድገትና ትራንስፎርሜሽን ዘመን የሁለተኛው ዓመት አጋማሽ አፈፃፀም ሪፖርትንም በዝርዝር እየገመገመ ነው፡፡ በዚህም የማክሮ ኢኮኖሚ፣ የኢኮኖሚና የማሕበራዊ ልማት ዘርፎች፣ የልማታ መልካም አስተዳደር እና የዴሞክራሲ ስርዓት ግንባታ  እንዲሁም የሴቶችና የወጣቶች ተሳትፎና ተጠቃሚነት አፈፃፀሞችን በዝርዝር በመፈተሽ ቀጣይ አቅጣጫ ያስቀምጣል ተብሎ ይተበቃል፡፡
የስራ አስፈጻሚ ኮሚቴው ስብሰባ በነገው ዕለትም ቀጥሎ እንደሚውል የኢህአዴግ ምክር ቤት ጽሕፈት ቤት በላከው መግለጫ አስታውቋል፡፡


ኢህአዴግ

ኢህአዴግ አገር የመምራት ሃላፊነትን ከተረከበ ጊዜ ጀምሮ ከውስጥም ከውጭም የሚነሱ በርካታ ውጣ ውረዶችን ያስተናገደ ድርጅት መሆኑ ይታወቃል፡፡ ከአገራችን ነባራዊ ሁኔታ ጋር የሚጣጣምና የህዝባችንን ሁለንተናዊ መለወጥ ታሳቢ ያደረገ የፖለቲካና ኢኮኖሚ ስርዓት በማራመድ በውጭ ሃይል ተፅእኖ የሚጠመዘዝ ድርጅት አለመሆኑን ገና በጠዋቱ በተግባር ያሳየ ድርጅት ነው፡፡

ከደርግ ውድቀት ማግስት አገራችን የመበታተን ስጋት ውስጥ የነበረችበት ሁኔታ ቢኖርም መላ የሃገሪቱን ህዝቦች በማስተባበርና በብስለት በመምራት ዴሞክራሲያዊ አንድነቷ በፅኑ መሰረት ላይ እየተገነባ እንዲዘልቅ አስችሏል። ህገ መንግስታችን የአንድነታችንና የመከባበራችን ማሰሪያ ውል እንዲሆን በሚያስችል መልኩ በህዝብ ሙሉ ተሳትፎ ተቀርፆ በመፅደቁ ያንን የመበታተን ስጋት ተሻግረን በጋራ ለዘላቂ ለውጥ መረባረብ ጀምረናል።